Որոնք են քաշի կտրուկ ավելացման հիմնական պատճառները

Քաշի ավելացումը որպես կանոն պայմանավորված է լինում սննդակարգի չափազանց բարձր կալորիականությամբ ու ֆիզիկական ակտիվության պակասով, ուստի ավելորդ կիլոգրամների կուտակման դեպքում խնդրից ազատվելու համար մարդիկ փորձում են նախ վերանայել իրենց սննդակարգն ու կենսակերպը։

Սակայն լինում են դեպքեր, երբ քաշի կտրուկ ավելացման պատճառ են դառնում առողջական որոշակի խնդիրները, որոնց դեպքում միջոցներ չձեռնարկելը կարող է շատ վտանգավոր լինել։ Մասնագետները նախազգուշացնում են, որ եթե քաշի ավելացումն անսպասելի է և չունի որևէ ակնհայտ պատճառ, ապա հարկավոր է անպայման բուժզննում անցնել վտանգավոր խանգարումները բացառելու համար։

Հարկ է հիշել, որ գոյություն ունեն քաշի ավելացման պատճառներ, որոնք վտանգավոր չեն ու չեն սպառնում առողջությանը, սակայն կան նաև այնպիսինները, որոնց դեպքում ժամանակին միջոցներ չձեռնարկելը կարող է ճակատագրական լինել։ Ձեր ուշադրությանն ենք ներկայացնում ավելորդ քաշի կուտակման հիմնական պատճառները, որոնք կապված չեն սննդակարգի ու կենսակերպի հետ։

Մկանային հյուսվածքների աճ Քաշի ավելացման պատճառներից մեկը մկանային հյուսվածքների աճն է։ Ինտենսիվ մարզումների ֆոնին նկատվող քաշի ավելացումը բնական գործընթաց է, ուստի անհանգստանալու պատճառ չկա։

Հեղուկի կուտակում Անսպասի ավելորդ կիլոգրամները կարող են պայմանավորված լինել հեղուկի կուտակմամբ։ Առավել հաճախ այս խնդիրը պայմանավորված է լինում սխալ սննդակարգով ու մեծ քանակությամբ կերակրի աղի գործածությամբ։ Օրինակ` ընդամենը 100 գրամ աղի ձուկ ուտելը կարող է ավելացնել քաշը 650 գրամով միայն հեղուկի կուտակման պատճառով։ Բացի այդ, այտուցների ու հեղուկի կուտակման պատճառ կարող են դառնալ նաև հորմոնալ խանգարումներն ու երիկամների հետ կապված խնդիրները, ուստի հարկավոր է զգոն լինել։

Որոշակի դեղորայքի ընդունում Դեղամիջոցներում պարունակվող որոշակի ակտիվ բաղադրիչներ կապում են ջուրը, ինչի հետևանքով այն կուտակվում է հյուսվածքներում։ Նման ազդեցությամբ է օժտված հակաբեղմնավորիչ դեղերում պարունակվող էստրոգենը, ուստի բեղմնականխիչ այդ միջոցների գործածության դեպքում կանաց քաշը կարող է ավելանալ ավելի քան երեք կիլոգրամով։ Բացի այդ, քաշի զգալի ու կտրուկ ավելացման պատճառ կարող են դառնալ նաև հակադեպրեսանտները։

Հիպոթիրեոզ Այս հիվանդությունը դրսևորվում է վահանագեղձի աշխատանքի խանգարմամբ, որի դեպքում օրգանը չի արտադրում բավարար քանակությամբ հորմոններ և նյութափոխանակությունը դանդաղում է։ Հիպոթիրեոզի դեպքում ածխաջրերը չեն յուրացվում ինչպես հարկն է և կուտակվում են ավելորդ ճարպաշերտերի տեսքով։ Քաշի ավելացումից բացի հիպոթիրեոզի մասին են հուշում նաև հոգնածության զգացումն ու թուլությունը։

Կուշինգի համախտանիշ Այս հիվանդության դեպքում մակերիկամների կեղևի հորմոնների արտադրությունը խանգարվում է, ինչն էլ հանգեցնում է հորմոնալ դիսբալանսի։ Այս խանգարմանը բնորոշ է քաշի ավելացումը մարմնի միայն որոշակի հատվածներում։ Այս դեպքում ճարպաշերտեր են կուտակվում դեմքի, պարանոցի և իրանի հատվածում, մինչդեռ վերջույթները շարունակում են մնալ նույնը։

Գլխուղեղի ուռուցքներ Հորմոնալ բալանսով պայմանավորված մետաբոլիկ գործընթացները կառավարվում են գլխուղեղի որոշակի հատվածների կողմից։ Այդ հատվածներում ուռուցքների առաջացումը կարող է հանգեցնել հորմոնալ փոփոխությունների, որոնք կարող են դառնալ քաշի կտրուկ ավելացման պատճառ։

Սրտային անբավարարություն Սրտային անբավարարությունը հաճախ ուղեկցվում է ոտքերի այտուցներով, որոնք նույնպես կարող են դառնալ քաշի ավելացման պատճառ։ Առավել հաճախ այս հիվանդության դեպքում այտուցվում են ոտնաթաթերին ու կոճերը։

Լյարդի ցիռոզ Քաշի ավելացումը կարող է պայմանավորված լինել նաև այս վտանգավոր հիվանդությամբ։ Ընդ որում` ցիռոզի դեպքում ճարպային հյուսվածքներն առաջին հերթին կուտակվում են գոտկատեղի հատվածում։

Նախադիաբետ ու շաքարային դիաբետ Այս վտանգավոր խանգարումների դեպքում խանգարվում է շաքարի փոխանակությունը, ինչը կարող է դառնալ քաշի ավելացման պատճառ։ Մարդու օրգանիզմն աշխատում է այնպես, որ ավելորդ ածխաջրերը կուտակվում են ճարպային պաշարների տեսքով, ուստի քաշի անբացատրելի ավելացման դեպքում հարկավոր է ստուգել արյան մեջ շաքարի մակարդակը։

Понравилась статья? Поделиться с друзьями:
ENTERTAINMENT BLOG
Яндекс.Метрика